20. Simia Reĝo kaj Akva Demono
20. Simia Reĝo kaj Akva Demono
[Atentemo]
Iam antaŭ longa tempo en malproksima kaj profunda arbaro estis regno de 80000 simioj. Ili havis reĝon tiel grandan kiel cervidon. Li estis granda ne nur korpe, sed ankaŭ anime. Fakte, li estis Bodisatvo, la iluminiĝinto.
Iutage li avertis siajn regnanojn, dirante: "Miaj popolanoj, estas venenaj fruktoj en tiu ĉi profunda arbaro, kaj ankaŭ lagetoj posedataj de demonoj. Se vi vidos neordinaran frukton aŭ ne konatan lageton, ne manĝu aŭ trinku sen demandi min unue." Estante atentaj al sia saĝa reĝo, la simioj konsentis observi la ordonon.
Poste ili venis al nekonata lageto. Neniu el ili volis trinki akvon sen unue demandi la reĝon kvankam ili suferis de laceco kaj soifo pro serĉado de manĝaĵo. Do ili nur sidis sur arboj kaj sur la tero ĉirkaŭ la lageto.
Veninte al siaj popolanoj, la reĝo demandis: "Ĉu iu el vi trinkis la akvon?" Ili respondis: "Ne, Via Reĝa Moŝto. Ni observis vian ordonon." Li diris: "Bonege."
Poste li paŝis laŭ la bordo, ĉirkaŭ la lageto. Li ekzamenis la piedsignojn de bestoj irintaj en la akvon, sed vidis neniun piedsignon revenintan el la akvo! Do li konsciis, ke akva demono posedis la lageton. Li diris al la 80000 simioj: "La lageton posedas akva demono. Neniu eniru."
Post nelonge, la akva demono vidis, ke neniu el la simioj iris en la akvon por trinki. Do en formo de timiga monstro li sin montris el la mezo de la lageto. Li havis bluan ventregon, blankan vizaĝon kun elstaraj verdaj okuloj, kaj ruĝajn ungegojn kaj piedojn. Li diris: "Kial vi nur sidas ĉirkaŭe? Tuj venu en la lageton kaj trinku akvon."
La simia reĝo diris al la terura monstro: "Ĉu vi estas la akva demono, kiu posedas la lageton?" "Jes. Mi estas," li respondis. "Ĉu vi manĝas ĉiujn, kiuj iris en la akvon?" demandis la reĝo. "Jes. Prave," li respondis: "inkluzive de birdoj. Mi manĝas ilin ĉiujn. Kaj kiam via soifego pelos vin en la lageton por trinki, mi des pli ĝuoplene manĝos vin, la plej grandan simion el ĉiuj." Li grimacis kaj salivo gutadis de lia hareca mentono.
Sed la reĝo restis trankvila kun bone trejnita menso. Li diris: "Mi ne lasos vin manĝi min aŭ eĉ unu el miaj sekvantoj. Kaj krome, ni trinkos akvon laŭplaĉe!" La akva demono gruntis: "Tute ne eble! Kiel vi povus tion fari?" La simia reĝo respondis: "Ĉiu el ni 80000 simioj trinkos per bambueto kiel tubo. Kaj vi neniel kapablos atingi nin."
Kompreneble, ĉiuj, kiuj vidis bambuon, scias bone, ke estas malfacile trinki per bambueto. Bambuoj kreskas sekcio-post-sekcie kaj inter ĉiu sekcio estas nodo. Se ili uzos unu sekcion kiu estas tiel mallonga, do la demono povos kapti la simion, trenos lin sub la akvon kaj englutos lin. Sed pro la nodoj, estas neeble suĉi akvon tra pli ol unu sekcio.
La simia reĝo estis eksterordinara. Tio estas la kialo, ke tiel multe da simioj sekvis lin. En la pasinteco li faris bonon kaj trejnis sian menson kun tiel grandaj peneco kaj atentemo, ke li disvolvis sian mensan kvaliton tre bone. Jen kial oni diris, ke li havas "grandan menson", anstataŭ pro tio, ke li simple havis "grandan cerbon".
La Iluminiĝinto kapablis teni la bonan kvaliton en sia menso, kaj faris eksterordinaran aferon--miraklon. Unue, li prenis freŝan bambueton, trablovis por sennodigi ĝin, kaj suĉis akvon per ĝi el la lageto. Poste, eble tio aŭdiĝis pli mirinde, li svingis sian manon kaj ĉiuj bambuoj kreskantaj ĉirkaŭ la lageto perdis siajn nodojn. Ili fariĝis novspeca bambuo.
Poste, ĉiu el liaj 80000 sekvantoj prenis bambueton kaj trinkis akvon ĝiskontente tute facile. La akva demono tute ne povis kredi siajn okulojn. Grumblante, li enmerĝiĝis lasante gluglantajn vezikojn malantaŭ si.
La moralinstruo estas: Faru sondadon antaŭ ol salti en akvon.
