Vidi fonton por Utileco de Esperanto en internacia komunikado pri Budhismo

　　Utileco de Esperanto en internacia komunikado pri Budhismo

　　Kun la disvolvigxo de scienco kaj tekniko, pli kaj pli bonigxas la kondicxo por internacia komunikado. Tio ankaux donas grandan oportunecon por budhanoj en diversaj regionoj de la tuta mondo. Tamen la lingva problemo farigxis malfacile transigebla baro. La naciaj lingvoj kutime estas ege malfacile lerneblaj por alilandanoj. Mi donas ekzemplon pri cxina edukado. Kvankam cxiuj lernantoj en Cxinio eklernas la anglan lingvon en la elementa lernejo kaj ecx en infangxardeno, kaj krome, preskaux en cxiuj budhismaj kolegioj aux universitatoj de Cxinio oni ankaux instruas la anglan, tamen ege raras la budhanoj, kiuj scipovas interkomuniki kaj paroli pri Budhismo angle. Do la klopodo por ilia lernado de la angla lingvo estas preskaux vana. Cxu estas alia solvo por transpasi la lingvan baron dum nia interkomunikado? La respondo estas certa. La plej efika solvo estas apliki Esperanton por propagandi kaj disvastigi Budhismon.

　　Esperanto estas artefarita lingvo facila, utila kaj vaste aplikata en diversaj rondoj de diversaj landoj. Oni povas libere uzi gxin en internacia komunikado kaj atingi nivelon pli altan ol en aliaj lingvoj nur post mallonga lernado. Ekzemple en nia lando preskaux cxiuj tradukajxoj el la cxina lingvo estas faritaj de eksterlandaj profesiuloj pri la cxina lingvo, tamen la esperantajxoj tradukitaj el la cxina lingvo estas faritaj nur de cxinaj esperantistoj.

　　Do estas kelkaj avantagxoj pri aplikado de Esperanto en budhisma komunikado.

　　Facileco: Kvankam oni devas elspezi suficxe longan tempon kaj grandan energion por ellerni naciajn lingvojn, tamen Esperanto nur bezonas preskaux dekonon da tempo kaj energio. Preskaux cxiuj homoj kapablas mastri Esperanton en mallonga tempo se ili lernas gxin same diligente kiel al la aliaj lingvoj. Per intensiva metodo oni ecx povas atingi mezan nivelon en nur unu monato.

　　Vasta aplikebleco: Kvankam la sumo de esperantaj uzantoj estas ne komparebla kun tiu de grandaj naciaj lingvoj, tamen gxi estas uzata preskaux en cxiuj landoj, do oni povas trovi esperantistojn en diversaj regionoj de la mondo.

　　Precizeco: Pro gxia reguleco kaj facileco, oni povas esprimi sian ideon pli precize en Esperanto. Tio pliefike evitas la miskomprenon dum la komunikado. Do oni povas fari gxin pera lingvo dum nia interkomunikado kaj precipe tradukado pri Budhismo. Se ni unue esperantigas budhismajn verkojn, la esperantaj samideanoj el diversaj landoj povas elesperantigi ilin en siajn proprajn lingvojn. Tio estas multe pli efika ol tio, ke ni ellernas diversajn naciajn lingvojn por la tradukado.

　　Sama idealo: Veraj esperantistoj estas pacamantoj kaj ili same klopodas por la monda paco kiel veraj budhanoj. Ili havas pli intiman rilaton kun budhanoj kaj en la paciga afero ili volonte kontribuas per siaj energio kaj fervoro. Do gxuste pro tio, multaj esperantistoj volontas doni helpon dum nia budhisma laboro per Esperanto.

　　Cxi tie mi donas kelkajn sukcesajn ekzemplojn.

　　Nun estas du budhismaj organizoj por esperantistoj en la mondo. Unu el ili estas BLE (Budhana Ligo Esperantista, http://esperanto.us/budhana.html) kaj la alia estas JBLE (Japana Budhana Ligo Esperantista， http://www001.upp.so-net.ne.jp/jble/Budhismo.html), ili faris grandan kontribuon en propagando de Budhismo per Esperanto. Krome en Cxinio estas speciala retejo BRE (Budhana Retejo Esperantista, Esperante: http://www.budhano.cn Cxine: http://www.budhano.com), kiu lancxigxis antaux cxirkaux dek jaroj. Kiel esperantisto, Monahxo Miaohui ekpraktikis Esperanton en budhisma rondo nelonge post sia monahxigxo, lancxis la retejon BRE kaj retradion BRE (http://www.budhano.cn/podkasto), kaj ankaux ektradukis budhismajn verkojn en Esperanton. Gxis nun kvin libroj jam sukcese tradukigxis en Esperanto, kaj el tiuj jam eldonigxis du brosxuroj kaj tri diskoj el vocxlegitaj tradukoj. La eldonitaj libroj kaj diskoj distribuigxas en pli ol dudek landoj. Menciinde estas, ke dum lia laboro multaj esperantistoj el Cxinio kaj eksterlandoj oferis grandan helpon en korektado kaj modifo de la tradukoj, kaj iuj esperantistoj ecx elesperantigis la tradukojn de Miaohui en siajn proprajn lingvojn. Krome, aliaj membroj el BLE kaj JBLE ankaux faris multajn laborojn en esperantigado de budhismaj verkoj. 

　　Monahxejo Tiefosi cxe Urbo Xi’an estas unika cxina budhisma monahxejo, kie estas esperanta etoso kaj oni povas lerni Esperanton kaj Budhismon samtempe. En la monahxejo okazas diversaj esperantaj aktivadoj krom tiuj de Budhismo. Cxiuj esperantaj samideanoj ankaux estas bonvenaj en la monahxejo, kaj ekde antaux tri jaroj dekoj da samideanoj el diversaj landoj jam gastis,lernis kaj interkomunikis pri Budhismo kaj Esperanto en la monahxejo. Ekde la kuranta jaro en la monahxejo okazas internaciaj novjara esperanta aktivado kaj somera lernejo de Esperanto per kunlaboro kun esperantaj organizoj. Se budhanoj el diversaj landoj interesigxas pri Esperanto, sed ne povos trovi sxancon por lerni gxin, ni cxiam estas pretaj liveri la instruan helpon en Monahxejo Tiefosi, kaj se bezone, ekster la monahxejo. Fakte ni ankaux klopodas por pretigi internacian kurson aux lernejon pri Budhismo. Nia plano estas, ke la lernantoj el diversaj landoj unue partoprenos intensivan kurson de Esperanto en unu monato, kaj poste ili lernos Budhismon rekte en Esperanto dum du monatoj en la monahxejo. Cxiuj helpoj por tio estas bonvenaj.

　　Krom la supremenciitaj ekzemploj, Esperanto ankaux estas plivaste aplikata en aliaj religioj. En la esperantaj konferencoj landaj kaj internaciaj oni kutime okazigas esperantajn kunsidojn pri diversaj religioj. Tio donas al esperantistoj tre bonajn kondicxojn por koni kaj lerni religiojn pere de Esperanto. Gxuste pro tio mi sincere proponas, ke budhanoj kaj precipe budhismaj organizoj kaj kolegioj el diversaj landoj ekatentu pri Esperanto kaj kreu bonan kondicxon apliki Esperanton en budhismaj aferoj, por ke pli da homoj en la tuta mondo ricevu favoron de Budhismo pere de Esperanto.

　　Verkinto: Miaohui

　　Retadreso: miaohui@ebudhano.cn miaohui@wo.com.cn

　　Skype: Komencanto