Vidi fonton por La kapo de Cikatrulo

　　La kapo de la cikatrulo

　　Antaux pli ol dudek jaroj, al nia vilagxo frekventis mezagxa kastristo por porkidoj. Laux la dialekto, li ne estis nia samprovincano. Oni ne sciis pri liaj veraj nomo kaj hejmloko. Ili do simple nomis lin Cikatrulo, cxar sennombraj kavetoj kovris lian tutan vizagxon. 

　　Kvankam cxiuj plenkreskuloj opiniis lin afabla kaj bonkora, tamen por ni infanoj, precipe knabetoj, li estis multe pli timinda ol tigro. Kiam niaj petolajxoj cxagrenis la plenkreskulojn, ili timigis nin per tigroj aux lupoj. Vidinte tion ne tre helpa, ili kutime ekminacis per Cikatrulo, la kastristo. Cxiam ajn, tio povis teni nin kvietaj kaj obeemaj almenaux por momento. 

　　Cxiufoje, kiam ni knabetoj vidis lin de tre malproksime, ni sinprokraste forkuris aux kasxis nin por ke li ne vidu nin. En la okazo, ke ni estis tro proksimaj al li por forkuri aux kasxigxi, ni do forte kovris nian subventron per ambaux manoj kaj timeme sed sxajne ameme vokis lin Avo kun peto: "Avcxjo Cikatrulo, ne kastru min. Mi estas bona knabo." Tiam li ofte milde palpis al ni la kapon kaj metis la alian manon en sian posxon. Tio ja estis timinda, kaj ni ofte estis tro timigitaj por forkuri aux ekplori. Sed ne malofte, anstataux trancxilon, li elprenis por ni bombonojn. Tiam, gxuante liajn dolcxajn bonbonojn, ni kontrauxvole vokis lin Avcxjo, kaj samtempe fiksrigardis lian mildan vizagxon kun espero en la koro, ke li ne plu metu sian manon en la posxon. 

　　La knabinetoj estis tre felicxaj pri tio, cxar ili havas nenion por fortrancxi, kaj ili ecx ofte sin defendis per proklamo, "Se vi molestus min, mi diros al Avcxjo Cikatrulo, ke li kastru vin." Mi vere enviis la knabinetojn, kaj ofte riprocxis mian panjon kun ploro pro tio, ke sxi naskis min knabo. 

　　Tamen dum iu periodo oni ne plu vidis la cikatrulon. Oni eksopiris al li kaj maltrankviligxis rigardante siajn porkidojn ne kastritajn. Iuj supozis, ke li estis perforte kondukita al sia hejmloko, dum la aliaj opiniis, ke io malbona trafis lin. Baldaux alvenis timinda novajxo, ke Cikatrulo estis murdita kaj oni ecx trovis lian kapon en kampo de terpomo. Tio ege malgxojigis la plenkreskulojn cxar en nia regiono estis neniu alia kastristo krom li, tamen la novajxo plezurigis nin knabetoj. En la komencaj kelkaj tagoj, kiam ni renkontis unu al aliaj en la amiketa rondo, la unuaj vortoj ja estis, "Cxu vi scias, ke la cikatrulo estas morta? Li ne plu venos kastri nin." Tamen, la gxojinda afero donis al ni pli da turmentigxo. Pro la novajxo, la virinoj ne plu kuragxis iri el la vilagxo, kaj la plenkreskuloj ne plu permesis nin ludi en malproksima loko aux en malfrua vespero, timante, ke ni farigxus aliaj viktimoj de murdistoj. 

　　Tiu maltrankviliga situacio dauxris pli ol unu jaron antaux ol la cikatrulo eksteratendite aperis en nia vilagxo. Li tute ne mortis, sed nur estis malliberigita kelkan tempon por ke oni "detrancxu lian voston*"  Ho, li ecx havis voston! Sed kial ni ne rimarkis gxin antauxe? Ni ne povis deteni nin de miro kaj scivolemo. Tio ja estas la afero, kiun ni ekkomprenis nur post multaj jaroj. 

　　Do kiel ekaperis la onidiro, ke oni elterigis lian kapon en la kampo? Iom post iom mi trovis la devenon de tio. La kauxzo estas tre simpla, sed iom surpriziga. En iu loko ne tre malproksime, oni sin okupis en kolektado de terpomoj. Subite iu trovis terpomon tiel grandan kiel bovlo. Iuj asertis sxerce, ke tiu rara terpomo tre similas al la kapo de Cikatrulo. Dum ili cxirkauxis la eksterordinaran terpomon rigardante kaj sxercante, iu preterpasanto hazarde kaptis fragmentojn de iliaj babiloj kaj supozis, ke la cikatrulo estis murdita. Jen kial la simpla sensencajxo kauxzis grandan sensacion en nia regiono. 

　　Pli ol dudek jaroj jam pasis gxis nun, tamen mi neniam forgesis la cikatrulon, kiu jam mortis delonge. La kialo estas tre simpla. En mia vivo ne tre longa, ofte aperas tiaj aferoj, kian kauxzis la kapo de Cikatrulo. De tempo al tempo ankaux mi farigxis inicianto aux viktimo de tio. Tio ofte dronigis min en longtempa meditado. Kial oni nur emas sin kagxigi en sensencaj supozoj aux onidiroj, sed ne volas meti sin en esploron kaj pripenson pri la vero? 

　　* "Fortrancxi voston"
　　Iama politiko en cxinio, kiu malpermesas sinprofitigi per kromokupo , opiniante tion " la vosto de kapitalismo. "