Vidi fonton por 46, 268. Akvumi la Ĝardenon

　　46, 268.　Akvumi Gxardenon

　　[Malsagxo]

　　Gxuste antaux la Novjara Tago en Benareso de norda Hindio, cxiuj inkluzive de la gxardenisto de la regxa plezura gxardeno estis pretaj fari tritagan celebradon.

　　Aro da simioj vivis en la plezura gxardeno. Ili ne bezonis pensi tro multe, cxiam obeante la konsilon de sia simia regxo. 

　　La regxa gxardenisto deziris celebri la novjaran feston kiel cxiuj aliaj, do li decidis transdoni sian laboron al la simioj.

　　Li iris al la simia regxo kaj diris: "Cxu vi bonvolus fari iom da favoro por mi, mia honora amiko? Venas la novjara festo kaj ankaux mi volas partopreni en la celebrado. Do mi forestos dum tri tagoj. Estas abundaj fruktoj, beroj kaj nuksoj por mangxi en la gxardeno. Vi kaj viaj subuloj estas miaj gastoj, do mangxu tiom, kiom vi povas laux via placxo. Bonvolu akvumi la junajn arbojn kaj plantojn rekompence dum mia foresto."

　　La simia regxo respondis: "Ne maltrankviligxu pri tio, mia amiko. Ni faros la penigan laboron. Cxion bonan al vi!"

　　La gxardenisto montris al la simioj, kie estas la akvositeloj. Li foriris por celebri la festotagojn fidoplene. La simioj kriis malantaux li: "Felicxan Novjaron al vi!"

　　En la sekva tago, la simioj plenigis la sitelojn, kaj ekakvumis la junajn arbojn kaj plantojn. Tiam la simia regxo diris: "Miaj regnanoj! Estas nebone malsxpari akvon. Do elradikigu cxiujn junajn arbojn kaj plantojn antaux la akvumado. Esploru, kiom longaj estas la radikoj. Poste donu pli da akvo al tiuj kun longaj radikoj kaj malpli al tiuj kun la mallongaj. Tiel ni ne malsxparos akvon, kaj la gxardenisto certe plezurigxos pro tio!"

　　Pensante pri nenio plia, la obeemaj simioj akceptis la ordonon de la regxo.

　　Gxuste tiam sagxa homo ekstere preteriris la enirejon de la gxardeno. Vidinte, ke la simioj elradikigas la junajn arbojn kaj plantojn, mezuras la radikojn kaj zorgeme versxas akvon en la kavojn sur la tero, li demandis: "Kion vi faras en la bela gxardeno de la regxo laux via opinio, stultaj simioj?"

　　Ili respondis: "Ni akvumas la arbojn kaj plantojn sxpareme! Tion ordonis nia majesta regxo."

　　La viro diris: "Se tia estas la sagxo de via plej inteligenta regxo, kian sagxon posedas vi, la subuloj? Kun intenco fari bonan aferon, vi kauxzas fatalajxon pro malsagxo!" 

　　La moralinstruo estas: Nur malsagxuloj povas turni bonajn aferojn en la malbonajn.