Vidi fonton por 31. Ĉielo 33

　　31. Cxielo 33

　　Cxapitro 1. Kunlaboro

　　Iam antauxe, kiam Regxo Magadho regis en la lando, estis nobla junulo nomata "Magho la bonulo". Li vivis en malproksima vilagxo de nur tridek familioj. Kiam li estis juna, liaj gepatroj edzinigis al li knabinon, kiu havis bonan konduton kiel li. Ili vivis felicxe, kaj havis plurajn infanojn.

　　La vilagxanoj respektis lin, cxar li cxiam helpis plibonigi la vilagxon por favori al cxiuj. Pro ilia respekto al li, li povis instrui al ili kvin sxtupojn de trejnado por purigi iliajn mensojn, vortojn kaj kondutojn.

　　La instrumetodo de Magho la bonulo estis efektiva praktikado. Ekzemple, iutage kiam la vilagxanoj kolektigxis por fari manlaboron. Magho la bonulo purigis lokon por sidi, sed antaux ol li pretis sidigxi, iu alia sidigxis tien. Do li pacience purigis alian lokon. Sed ankaux la lokon okupis alia najbaro. Tio okazis foje kaj refoje, gxis li pacience purigis sidejojn por cxiuj. Nur tiam li sidigxis sur la lastan lokon.

　　Per ekzemploj de pacienco, Magho la bonulo instruis al vilagxanoj kiel harmonie kunlabori kun aliaj. Do laborante kune, ili konstruis plurajn konstruajxojn kaj faris aliajn laborojn favorajn al la tuta vilagxo.

　　Vidinte la brilan rezulton de pacienco kaj kunlaboro sur la bazo sekvi la gxentilajn metodojn de kvin trejnaj sxtupoj, cxiuj vilagxanoj farigxis pli pacemaj kaj harmoniaj. La antauxaj eraroj kaj konfliktoj de la vilagxanoj tute malaperis.

　　Eble vi opinias, ke tio pli felicxigis al cxiuj, tamen iu tute ne sxatis la novan situacion. Li estis la vilagxestro, politikistacxo, kiu zorgis nur pri sia propra pozicio. 

　　Antauxe, kiam estis murdistoj kaj sxtelistoj, li kutime punis ilin. Tio pliigis lian auxtoritatan pozicion kaj timigis la vilagxanojn. Kiam iu el la geedzoj faris malcxastajxon, la vilagxestro kutime monpunis tiun. Same, Se trovigxis kalumniato, aux ies kontrakto ne plenumigxis, li ankaux postulis monon por tio. Li ecx kolektis imposton el profito en vendado de alkoholajxo anstataux zorgi, ke ebrieco kauxzas multajn krimojn.

　　Do estis facile vidi, kial la vilagxestro tiel maltrankviligxis pri perdo de siaj honoro, potenco kaj mono pro paca vivo de la vilagxanoj. Fine, li iris al la regxo kaj raportis: "Via Regxa Mosxto, iuj malproksimaj vilagxoj estis prirabitaj de banditoj. Ni bezonas vian helpon."

　　La regxo respondis: "Eskortu la krimulojn al mi."

　　La malhonesta politikistacxo kunvenigis la mastrojn de cxiuj tridek familioj kaj eskortis ilin al la regxo kiel krimulojn. Anstataux esplori la kazon, la regxo ordonis, ke ili estu ekzekutitaj piedpremite de elefantoj.

　　Cxiuj tridek viroj kusxis en la palaca korto laux la ordono, kaj oni elkondukis elefantojn. Nur tiam ili ekkonsciis, ke ili estos mortigitaj de la elefantoj. Magho la bonulo diris al ili: "Memoru, ke vi koncentru vian menson sur pacon kaj puron el praktikado de la kvin trejnaj sxtupoj, kaj vi sentos kompaton al cxiuj. Ne koleru kontraux la maljusta regxo, mensogema oficisto aux malfelicxaj elefantoj."

　　Elefantisto alkondukis la unuan elefanton. Sed kiam li ordonis gxin piedpremi la senkulpajn vilagxanojn, la elefanto rifuzis. Kun fiereco, gxi foriris. Mirinde, tion ripetis cxiuj elefantoj de la regxo, kaj neniu piedpremis ilin.

　　La elefantistoj raportis al la regxo, ke tio ne estas ilia kulpo. "Eble," ili diris: "tiuj viroj posedas drogon, kiu konfuzis la elefantojn."

　　La regxo ordonis trasercxi la vilagxanojn, sed trovis nenion. Do liaj konsilantoj diris: "Eble ili estas sorcxistoj, kiuj povas apliki malicajn sorcxvortojn sur grandajn elefantojn!"

　　Oni demandis la vilagxanojn: "Cxu vi havas tiajn sorcxvortojn?" Magho la bonulo respondis: "Jes. Ni havas." La regxo tre scivolis pri tio. Do li mem demandis al Magho la bonulo: "Kio estas la sorcxvortoj, kaj kiel ili funkcias?"

　　Magho la bonulo respondis: "Via Regxa Mosxto, ni ne aplikas la samajn sorcxvortojn, kiujn aplikas aliuloj. Ni aplikas la kompatemajn sorcxvortojn kun purigita menso laux la kvin trejnaj sxtupoj."

　　"Kio estas la kvin trejnaj sxtupoj?" demandis la regxo mirigite. Magho la bonulo respondis: "Ni cxiuj sindetenas de kvin malbonaj kondutoj, kiuj estas: mortigo, sxtelo, malcxasto, mensogo kaj alkoholajxo."

　　"Tiel ni farigxas ne malutilaj kaj povas doni sentimecon al cxiuj. Pro tio la elefantoj perdis timon al la trejnistoj kaj ne plu volas vundi nin. Ili forlasis trumpetante triumfon. Tio estas niaj protektaj metodoj, kiujn vi nomas 'sorcxvortoj'."

　　Fine, konsciinte pri la sagxo kaj bona konduto de la vilagxanoj, la regxo demandis ilin kaj detale informigxis pri la vero. Li do konfiskis cxiujn havajxojn de la malhonesta vilagxestro kaj dividis ilin inter la vilagxanoj.

　　La vilagxanoj denove liberigxis por fari pli bonan laboron favoran al la tuta vilagxo. Ili baldaux ekkonstruis hotelon cxe vojkrucigxo.

　　Tio estis la plej granda projekto, kiun ili akceptis. La viroj estis memfidaj cxar ili lernis tre bone kiel kunlabori kun aliaj por la komuna celo. Sed ili ne lernis kiel kunlabori kun virinoj en la laboro. Ili opiniis, ke tio estas laboro nur de viroj.

　　Tiam Magho la bonulo havis kvar edzinojn. Iliaj nomoj estis Bonfaro, Belo, Felicxo kaj Bonnaskigxo. La unua edzino Bonfaro estis la plej sagxa. Sxi volis trovi metodon por ke virinoj sin profitu de kunlaboro en la bona afero. Do sxi iom post iom amikigxis kun la estro de la hotela projekto.

　　Sxi volis fari grandan kontribuon, do sxi sendis donacon al la estro. Sxi demandis lin: "Cxu vi povas elpensi metodon, ke mi farigxu la plej granda kontribuanto de la projekto?"

　　La estro respondis: "Mi scias bonan metodon por tio!" Tiam li sekrete prilaboris trabon, la plej gravan parton de la konstruajxo por subteni la supron. Li pakis gxin kaj kasxis gxin cxe Bonfaro por ke gxi sekigxu kaj farigxu rekta kaj fortika antaux la utiligo.

　　Samtempe, cxiuj viroj en la vilagxo gxojplene dauxrigis la konstruadon. Je la fino kiam ili bezonis instali trabon, ili komencis prilabori gxin. Sed la estro haltigis ilin. Li diris: "Miaj amikoj, ni ne uzos la fresxan bluan lignon kiel la trabon por la supro. Gxi kurbigxos kaj falos. Ni devas trovi malfresxan kaj sekan trabon. Iru kaj sercxu gxin!"

　　Ili sercxis tra la tuta vilagxo, kaj fine trovis, ke Bonfaro hazarde havas tauxgan trabon. Ankaux gxiaj longeco kaj dikeco estas tre konvenaj. Kiam ili demandis, cxu ili povas acxeti gxin de sxi, sxi respondis: "Mi ne vendos gxin je ajna prezo. Mi volas donaci la trabon senpage nur se vi permesas min partopreni la konstruadon de la hotelo."

　　La viroj ne kuragxis sxangxi la kutimon. Do ili respondis: "Virinoj neniam partoprenis en tia laboro. Tio estas neebla."

　　Poste ili revenis al la estro kaj raportis lin pri la okazajxo. Li diris: "Kial vi rifuzis sxian proponon? Virino ankaux estas parto en la homa mondo. Ni estu grandanimaj kaj dividu la harmonion kaj unuanimecon de tiu cxi laboro kun virinoj. Tiam la projekto kaj nia vilagxo estos des pli sukcesplenaj."

　　Do ili akceptis la trabon de Bonfaro, kaj sxi helpis fini la konstruadon de la hotelo. Tiam Belo havis belegan gxardenon cxe la hotelo kaj gxin sxi donacis. En la gxardeno estis diversaj floroj kaj fruktarboj. Felicxo havis cxarman lageton, kaj en gxi kreskis belaj lotusoj. Sed Bonnaskigxo, la plej juna kaj dorlotita, nenion kontribuis por la hotelo.

　　En la nokto, Magho la bonulo okazigis kunvenon en la cxevoja hotelo. Li instruis la vilagxanojn helpi al la gepatroj kaj agxuloj, kaj sin deteni de avaro, krudaj vortoj kaj klacxoj.

　　Laux onidiro, la plej malsupra cxielo konsistas el feoj de kvar direktoj: Nordo, Oriento, Sudo kaj Okcidento. Sekvante sian propran instruadon, Magho la bonulo forpasis kun bona menso. Li renaskigxis kiel Sakao, la regxo de la cxielo super la plej malsupra.

　　Poste forpasis Bonfaro, Belo, Felicxo kaj ankaux cxiuj mastroj de la familioj en la vilagxo. Ili renaskigxis sub Regxo Sakao. Tio farigxis famkonata "Cxielo 33."

　　Cxapitro 2. Kompato

　　Antaux longa tempo, estis mizere malbelegaj dioj nomataj "asxuroj". Ili vivis en la cxielo super la plej malsupra.

　　La viro, kiu iam estis Magho la bonulo en la antauxa vivo, nun estis Sakao, la regxo de Cxielo 33. Li pensis: "Kial ni, anoj de Cxielo 33, vivas kun tiuj malbelegaj asxuroj? Jen estas nia propra mondo, do ni vivu felicxe sen ili."

　　Li invitis la asxurojn al la festeno, kaj ebriigis ilin per forta alkoholajxo. Sxajne, pro la renaskigxo Regxo Sakao forgesis la instruojn kiujn li donis al aliaj kiam li estis en la antaǔa vivo kiel Magho la bonulo. Post kiam la asxuroj ebriigxis, li movis ilin en la malsupran mondon, same grandan kiel Cxielo 33.

　　Kiam la asxuroj sobrigxis kaj ekkonsciis, ke ili trompigxis en la malsupran cxielon, ili eksplodis de kolero. Ilituj iris en la supran cxielon kaj militis kontraux Sakao. Post nelonge, ili venkis, kaj Sakao povis fari nenion alian ol forfugxi.

　　Dum la retirigxo en potenca militcxaro, Regxo Sakao iris en vastan arbaron, kie la garuloj havas siajn nestojn. Tiuj malfelicxaj feoj havis nenian potencon. Ili povis fari nenion alian ol disflugi cxirkauxen, frapante siajn grandajn flugilojn.

　　Kiam la cxaro de Regxo Sakao veturis tra la arbaro, la nestoj detruigxis kaj la garulidoj falis surteren. Ili ploregis pro timo kaj doloro. Auxdinte tion, Sakao demandis, de kie venas la korsxiraj ploroj. La cxaristo respondis: "Jen ploroj de timigitaj garulidoj, kies nestoj kaj arboj estas detruitaj de via potenca cxaro."

　　Informigxinte pri tio, Regxo Sakao ekkonsciis, ke tre efemeras cxiuj vivoj, inkluzive de la lia. Auxdinte pri sufero de la garulidoj, li rememoris pri la kompato de la Grandulo, kiu pasis de vivo al vivo. Li diris: "Ne plu timigu la etulojn. La unuan trejnan sxtupon mi rompis senkonscie. Mi ne plu domagxos ecx mian vivon por la cxiela regno, kiu detruigxos iutage. Anstatauxe, mi dedicxos mian vivon al malicaj asxuroj. Returnu la cxaron!"

　　Do la cxaro revenis al la direkto de Cxielo 33. Vidinte, ke Regxo Sakao revenis, la asxuroj opiniis, ke li akiris helpon de aliaj mondoj. Do ili forkuris en la malsupran mondon ecx sen retrorigardi.

　　Cxapitro 3. Merito

　　Regxo Sakao revenis al sia palaco en Cxielo 33. Cxe la palaco staris etagxdomo de lia unua edzino, la renaskigxinta Bonfaro. Ekster la etagxdomo estis gxardeno de lia dua edzino, la renaskigxinta Belo. Kaj ankaux estis cxiela lageto de lia tria edzino, la renaskigxinta Felicxo.

　　Ankaux Bonnaskigxo mortis, kaj renaskigxis kiel malforta gruo en la arbaro. Pro sopiro al sxi, Sakao trovis sxin kaj portis sxin en Cxielon 33 por vizito. Li montris al sxi la etagxdomon, gxardenon kaj lageton de siaj tri edzinoj. Li informis sxin, ke la aliaj tri edzinoj gajnis meriton pro la bonfaro. La merito alportis felicxon al ili kaj en la antauxaj vivoj kaj en la renaskigxoj.

　　Li diris: "Mia kara gruo, en via antauxa vivo kiel Bonnaskigxo, vi faris neniun bonan aferon. Do vi ne gajnis meriton por felicxo, tiel ke vi renaskigxis kiel arbara gruo. Mi proponas, ke vi purigu vian menson sekvante la kvin trejnajn sxtupojn." Lerninte pri la kvin trejnaj sxtupoj, la aminda gruo decidis sekvi ilin. Poste, sxi revenis al la arbaro.

　　Post nelonge, la Regxo Sakao volis scii, kiel kondutas la gruo. Do li aliformigxis en fisxon kusxantan antaux sxi. La gruo prenis gxin je la kapo, sed apenaux sxi pretis engluti la regxon de Cxielo 33, kiam la fisxo svingis la voston.

　　La gruo tuj pensis: "La fisxo vivas!" Rememorinte pri la unua trejna sxtupo, sxi metis la vivan fisxon en rojon. Starigxinte el la akvo, Regxo Sakao montris sian antauxan formon kaj diris: "Bonege, mia kara gruo, vi sekvas la kvin trejnajn sxtupojn." Poste, li revenis en sian cxielon.

　　Trapasinte sian vivon, la gruo mortis. Sekvante la kvin trejnajn sxtupojn, sxi gajnis kaj meriton kaj pacan menson. Do sxi renaskigxis kiel knabino en familio de metiisto en norda Hindio.

　　Regxo Sakao denove volis trovi, kie naskigxis la iama Bonnaskigxo kaj posta gruo. Li trovis sxin en la familio de metiisto, kaj volis helpi sxin gajni meriton kaj felicxon.

　　Do li sin sxajnigis maljunulo, kaj pusxis cxaron plenan de oraj kukumoj. Li iris en Benareson kaj kriis: "Kukumojn! Kukumojn! Orajn kukumojn mi havas!"

　　Kiam oni venis por acxeti la mirindajn kukumojn, li diris: "La orajn kukumojn mi ne vendos, sed nur donacos, al tiu, kiu kondutas bone kaj sekvas la kvin trejnajn sxtupojn."

　　Oni diris: "Ni neniam auxdis pri la kvin trejnaj sxtupoj. Sed ni nur volas acxeti viajn orajn kukumojn. Diru al ni la prezon!" Li respondis refoje: "Miaj kukumoj tute ne vendigxos. Mi donacos ilin al iu ajn, kiu praktikas la kvin trejnajn sxtupojn." Oni diris: "Tiu cxi viro venis nur por mistifiki nin." Do ili forlasis lin sola.

　　Bonnaskigxo baldaux auxdis pri la stranga maljunulo. Kvankam sxi jam renaskigxis, tamen sxi ankoraux havis kutimon praktiki la kvin trejnajn sxtupojn. Do sxi pensis: "Eble tiu cxi viro venas por sercxi min."

　　Do sxi iris al li kaj petis la orajn kukumojn. Li demandis: "Cxu vi sekvas la kvin trejnajn sxtupojn? Cxu vi vere detenas vin de mortigo, sxtelo, malcxasto, mensogo kaj alkoholajxo?" Sxi respondis: "Jes, Sinjoro. Mi sekvas la sxtupojn, kaj estas tre pacema kaj felicxa."

　　La maljunulo diris: "Mi alportis la kukumojn speciale al vi por kuragxigi vin gajni pli da merito kaj estonta felicxo." Li lasis la orajn kukumojn cxe sxi, kaj revenis al Cxielo 33.

　　En sia resta vivo, la virino cxiam estis malavara pri oro. Sxi donacis sian felicxon al cxiuj aliaj kaj gajnis grandan meriton. Post sia morto, sxi renaskigxis kiel filino de asxura regxo kaj aspektis kiel cxarma feino. Tio estis miraklo, cxar aliaj asxuroj estis la plej malbelaj el cxiuj feoj.

　　La regxo de asxuroj plezurigxis pro la feineco kaj eksterordinara cxarmo de sia filino. Li kolektis cxiujn asxurajn virojn por ke sxi prenu edzon el ili laux sia volo.

　　Sakao, la regxo de Cxielo 33 bone sciis, ke la renaskigxinta regxidino estis lia estinta edzino Bonnaskigxo, kiu antauxe estis la gruo kaj poste filino de metiisto. Do li subiris en la malsupran cxielan mondon kaj sin aliformigis en malbelan asxuron. Li pensis: "Se Bonnaskigxo prenos edzon, kies interna kvalito de konduto estas same bona kiel la sxia, ni certe rekunigxos finfine!"

　　Pro sia antauxa rilato kun Magho la bonulo renaskigxinta kiel Regxo Sakao, kiu nun aliformigxis kiel ordinara asxuro, la bela regxidino tuj allogigxis de li. Do sxi elektis lin el cxiuj kandidatoj.

　　Regxo Sakao kondukis sxin al Cxielo 33 kiel sian kvaran edzinon, kaj poste ili vivis felicxe.

　　La moralinstruo estas: Praktiko de kvin trejnaj sxtupoj estas komenco de bona konduto. Bona konduto estas komenco de paco kaj felicxo.