Vidi fonton por 20. Simia Reĝo kaj Akva Demono

　　20. Simia Regxo kaj Akva Demono

　　[Singardemo]

　　Iam antaux longa tempo en malproksima kaj profunda arbaro estis regno de 80000 simioj. Ili havis regxon tiel grandan kiel cervidon. Li estis granda ne nur korpe, sed ankaux anime. Fakte, li estis Bodisatvo, la iluminigxinto.

　　Iutage li avertis siajn regnanojn, dirante: "Miaj popolanoj, estas venenaj fruktoj en tiu cxi profunda arbaro, kaj ankaux lagetoj posedataj de demonoj. Se vi vidos neordinaran frukton aux ne konatan lageton, ne mangxu aux trinku sen demandi min unue." Estante atentaj al sia sagxa regxo, la simioj konsentis obei la ordonon.

　　Poste ili venis al nekonata lageto. Neniu el ili volis trinki akvon antaux ol demandi la regxon, kvankam ili suferis de grandaj laceco kaj soifo pro sercxado de mangxajxo. Do ili nur sidis sur arboj kaj sur la tero cxirkaux la lageto. 

　　Veninte al siaj popolanoj, la regxo demandis: "Cxu iu el vi trinkis la akvon?" Ili respondis: "Ne, Via Regxa Mosxto. Ni obeis vian ordonon." Li diris: "Bonege."

　　Poste li pasxis laux la bordo cxirkaux la lageto. Li ekzamenis la piedsignojn de bestoj irintaj en la akvon, sed vidis neniun piedsignon revenintan el la akvo! Do li konsciis, ke la lageton posedas  akva demono. Li diris al la 80000 simioj: "La lageton posedas akva demono. Neniu eniru."

　　Post nelonge, la akva demono vidis, ke neniu el la simioj iris en la akvon por trinki. Do en formo de timiga monstro li sin montris el la mezo de la lageto. Li havis grandan bluan ventron, rugxajn ungegojn kaj piedojn, kaj blankan vizagxon kun elstaraj verdaj okuloj. Li diris: "Kial vi nur sidas cxirkauxe? Tuj venu en la lageton kaj trinku akvon."

　　La simia regxo demandis al la terura monstro: "Cxu vi estas la akva demono posedanta la lageton?" Li respondis: "Jes. Mi estas." La simia regxo demandis: "Cxu vi mangxas cxiujn, kiuj iris en la akvon?" Li respondis: "Jes. Prave, inkluzive de birdoj. Mi mangxas ilin cxiujn. Kaj kiam via soifego pelos vin en la lageton por trinki, mi des pli gxuoplene mangxos vin, la plej grandan simion el cxiuj." Li grimacis kaj salivo gutadis de lia harplena mentono.

　　Sed la regxo restis trankvila kun bone trejnita menso. Li diris: "Mi ne lasos vin mangxi min aux ecx unu el miaj sekvantoj. Kaj krome, ni trinkos akvon lauxplacxe!" La akva demono gruntis: "Tute ne eble! Kiel vi povus tion fari?" La simia regxo respondis: "Cxiu el ni 80000 simioj trinkos per bambueto kiel sucxtubo. Kaj vi neniel kapablos atingi nin."　

　　Kompreneble, cxiuj, kiuj vidis bambuon, scias bone, ke estas malfacile trinki per bambueto. Bambuoj kreskas sxalmo-post-sxalme kaj inter du sxalmoj estas nodo. Se simioj uzas unu sxalmon por trinki akvon, la tubo estas tiel mallonga, ke la demono povas kapti ilin, treni ilin sub la akvon kaj engluti ilin. Sed pro la nodoj, estas neeble sucxi akvon tra pli ol unu sxalmo.

　　La simia regxo estis eksterordinara. Jen la kauxzo, kial tiel multaj simioj sekvis lin. En la pasinteco li faris bonon kaj trejnis sian menson kun tiel grandaj peno kaj atentemo, ke li disvolvis sian mensan kvaliton tre bone, kaj tial oni diris, ke li havas "grandan menson", anstataux pro tio, ke li simple havis "grandan cerbon".

　　La Iluminigxinto kapablis teni la bonan kvaliton en sia menso, kaj faris eksterordinaran  miraklon. Unue, li prenis fresxan bambueton, trablovis por sennodigi gxin, kaj sucxis akvon per gxi el la lageto. Poste, eble estis pli mirinde, ke li svingis sian manon kaj cxiuj bambuoj kreskantaj cxirkaux la lageto perdis siajn nodojn. Ili farigxis novspeca bambuo.

　　Poste, cxiu el liaj 80000 sekvantoj prenis bambueton kaj tute facile trinkis akvon gxiskontente. La akva demono tute ne povis kredi siajn okulojn. Grumblante, li enmergxigxis lasante gluglantajn vezikojn malantaux si.

　　La moralinstruo estas: Esploru antaux ol salti en akvon.