Vidi fonton por 2-5. Devadato, malamiko de la Budho

　　37. 2-5. Devadato malamika al la Budho

　　Devadato estis filo de Regxo Supabuda kaj ties edzino Pamita, kiu estis onklino de la Budho. Fratino de Devadato estis Jasodara, do li estis kuzo kaj samtempe bofrato de la Budho. Kune kun Ananda kaj aliaj sxakjaj regxidoj, li aligxis en la frua periodo al la monahxa rondo administrata de la Budho, sed li atingis nenian sanktecon, kaj tiel li eklaboregis por supernaturaj povoj en la mondo.

　　En la frua periodo li estis bona monahxo fama pro siaj gracio kaj supernaturaj povoj. Poste li farigxis tro memfida pri siaj famo kaj povo. Liaj jxaluzo kaj malbona deziro al la Budho pliigxis kaj li farigxis granda malamiko al la Budho.

　　Iutage en granda kunveno, kiun cxeestis regxoj kaj princoj, Devadato iris al la Budho kaj petis, ke tiu faru lin gvidanto de la monahxa komunumo. La Budho rifuzis lian postulon cxar li ne estis kapabla kaj suficxe konvena por tio. Devadato ege kolerigxis kaj sekve de tio, jxuris sin vengxi kontraux la Budho.

　　Kvankam Devadato estis malbona monahxo, li havis multajn adorantojn kaj sekvantojn. Unu el liaj cxefaj subtenantoj estis Regxo Agxatasatu, kun kiu li diskutis pri siaj kolero kaj intrigo por sin vengxi. Ili kune planis mortigi Regxon Bimbisara, la patron kaj rivalon de Agxatasatu, kaj la Budhon, la malamiko de Devadato. Agxatasatu sukcese mortigis sian patron, sed Devadato malsukcesis tion fari al la Budho.

　　La unua provo de Devadato mortigi la Budhon estis, ke li dungis viron por tion fari. Lia plano estis, ke post la sukceso, la viro estos mortigita de du aliaj viroj, kiuj sinsekve estos mortigitaj de kvar aliaj viroj. Poste la kvar viroj estos mortigitaj de aliaj ok viroj. Sed la unua viro ektimis pri sia ago kiam li proksimigxis al la Budho. Li demetis siajn armilojn kaj rifugxis al la Budho. Fine, cxiuj dungitaj viroj por mortigi unu alian farigxis discxiploj de la Budho, kaj fiaskis la ruza plano de Devadato.

　　Poste Devadato provis mortigi la Budhon propramane. Kiam la Budho iris preter la Vultura Monto, Devadato grimpis sur la montpinton kaj pusxfaligis grandan sxtonon al la Budho. Ruligxante malsupren, la granda sxtono frapigxis kontraux alia roko, kaj disigita peceto vundis la Budhon je la piedo kaj kauxzis lian sangadon. La Budho suprenrigardis, vidis Devadaton, kaj diris kun kompatemo: “Malsagxulo, vi jam faris multe da malbonaj kondutoj por mortigi la Budhon.”

　　La tria provo de Devadato mortigi la Budhon estis, ke li ebriigis per alkoholajxo la ferocan hommortigan elefanton nomatan Nalgiri. Kiam Nalgiri vidis la Budhon alvenanta de malproksime, gxi sin jxetis por ataki lin kun siaj levitaj oreloj, vosto kaj rostro. Kiam proksimigxis la elefanto, la Budho koncentris sian amon al la Elefanto. La amo de la Budho estis tiel vasta kaj profunda, ke la elefanto haltis, kvietigxis kaj starigxis antaux la mastro post kiam gxi proksimigxis al li. La Budho karesis la rostron de la elefanto, kaj parolis al gxi gxentile. La elefanto respekte formovis la polvon de sur la piedoj de la mastro per sia rostro, kaj metis la polvon sur sian propran kapon. Poste gxi retirigxis kun la kapo al la Budho gxis la elefantejo, kaj tute mildigxis. Oni kutime dresis elefantojn per vipoj kaj armiloj, sed la Honorulo tion faris per sia amo.

　　Ankoraux volante farigxi gvidanto de la monahxa komunumo, Devadato provis alian planon insidan. Kun helpo de kvincent malbonaj monahxoj, li planis disigi la monahxan komunumon.

　　Li postulis, ke la Budho devigu al la monahxoj observi jenajn kvin aldonajn regulojn:

　　1. Vivi en la arbaro dum la tuta vivo.

　　2. Teni la vivon nur per almozpeto.

　　3. Sin vesti per roboj faritaj el cxifonajxoj kolektitaj el rubejoj kaj tombejoj.

　　4. Vivi sub la arboj.

　　5. Abstini de mangxado de fisxoj kaj viando dum la tuta vivo.

　　Devadato faris tiun cxi postulon, bone sciante, ke la Budho rifuzos gxin. Devadato gxojis, ke la Budho ne aprobis la kvin regulojn, kaj li uzis tion por kolekti subtenantojn kaj sekvantojn. Novaj monahxoj, kiuj ne bone sciis la Darmon, forlasis la Budhon kaj prenis Devadaton kiel sian gvidanton. Fine post kiam la Estimataj Sxariputa kaj Mogalana eksplikis la Darmon al ili, ili revenis al la Budho.

　　Post tio, malbona tempo trafis Devadaton. Li grave malsanigxis je la malsukceso de liaj planoj, tamen antaux sia morto li sincere pentis pri siaj malbonaj kondutoj, kaj volis vidi la Budhon. Sed la fruktoj de lia malbona karmo jam maturigxis kaj preventis lin tion fari. Lia malsano gravigxis sur lia vojo al la Budho, kaj cxe la pordo de Gxetavana Monahxejo. Felicxe, antaux sia morto li konvertigxis al la Budho.

　　Kvankam li suferis en mizera stato pro siaj krimoj, el lia sankta monahxa vivo en la frua periodo rezultis, ke li farigxos Paceka Budho nomata Atisara en la malproksima estonteco. Kiel Paceka Budho li povos atingi iluminigxon per siaj propraj klopodoj.