Vidi fonton por 2-31. La lastaj vortoj de la Budho

　　2-31. La lastaj vortoj de la Budho

　　Post la parolado al Subada, la Budho denove diris al Ananda: “Ananda, eble iuj el vi diros, ‘Neniun instruiston ni havos sen Budho, la supera instruisto.’ Ne, Ananda, ne tiel pensu. Kia ajn doktrino kaj disciplino instruita kaj konigita de mi estos via instruisto post mia forpaso.”

　　Poste, la Budho diris al aliaj monahxoj: “Se iu el vi havas dubojn pri la budho, darmo aux samgo, demandu min en la nuna tempo, por ke vi ne bedauxru poste pro tio, ke vi ne demandis min dum mi ankoraux vivis kun vi.”

　　Sed la monahxoj nenion diris. Neniu havis demandojn kaj ili cxiuj sin tenis silentaj. La Budho tiel diris al la monahxoj trifoje, sed ricevis neniun respondon.

　　La Budho diris: “Eble vi nenion demandis al mi pro via respekto al la instruisto. Do unu el vi diru tion al alia.” La discxiploj ankoraux silentis.

　　Tiam Ananda diris al la Budho: “Bonege, mirinde, Sinjoro! Mi kredas, ke cxiuj monahxoj cxi tie havas neniom da dubo kaj demando pri la budho, darmo kaj samgo, aux pri la vojo kaj metodo de trejnado kaj konduto.”

　　“Por vi, Ananda,” diris la Budho, “tio eble estas la afero de fido kaj kredo. Sed, Ananda, mi scias bone, ke neniu monahxo veninta cxi tien havas dubon aux demandon pri tiuj aferoj. La plej postigxinta el cxiuj 500 monahxoj cxi tie estas sotapana, anstataux viktimo falonta al malsuperaj statoj de ekzisteco, kaj ili cxiuj certas pri sia destino al la iluminigxo.”

　　Poste, la Budho ekparolis al cxiuj monahxoj refoje, kaj faris la lastan instruon: 

　　“Atentu, monahxoj. Jen mia lasta instruo al vi. Cxiuj komponajxoj en la mondo estas sxangxigxemaj. Ili ne dauxras longe. Pene laboru por atingi vian propran liberigxon.”

　　Poste, la Budho enmeditigxis pli kaj pli profunden de nivelo al alia. Sekve li elmeditigxis lastafoje kaj forpasis en nirvanon, lasante nenion kauxzi lian renaskigxon en tiu cxi aux aliaj vivoj.

　　La forpaso aux fina nirvano de la Budho okazis en la jaro 543 a.K, en la plenluna tago de majo, la fama Vesako laux hinda kalendaro.