Vidi fonton por 1-9. La rakonto de Monaĥo Nanda

　　1-9. La rakonto de Monahxo Nando

　　Kiel Pluvo penetras

　　la domon malbone tegmentitan,

　　Voluptemo same penetras

　　la menson malbone kulturitan.

　　Kiel pluvo ne penetras

　　la domon bone tegmentitan,

　　Voluptemo neniam penetras

　　la menson bone kulturitan.

　　Dum sia restado en Gxetavana Monahxejo de Sravastio, la Budho parolis tiujn versajxojn rilate al sia kuzo Monahxo Nando. Konsciinte, ke estas gxusta tempo por la Budho viziti sian patron, Estimata Kaludaji priskribis la belecon de la vojagxo kaj kondukis la Budhon kaj lian sekvantaron de multaj arahantoj al Kapilavasto. Tie la Budho donis darman pluvon pri la Vesantara Jatako akompanate de siaj familianoj. En la sekvinta tago li eniris la urbon por almozpeti. Lia patro atingis la frukton de Konvertigxo auxdinte lian versajxon "Homo devas peni kaj ne rajtas havi malatentan vivon." Poste, Maha Pagxapati atingis frukton de konvertigxo kaj lia patro atingis frukton de la dua grado auxdinte lian versajxon "Homo devas vivi honeste".

　　En la sekva tago, dum la asperga, festena kaj geedzigxa ceremonioj de Regxido Nando, la Budho eniris por peti almozon. Li metis sian bovlon en la manojn de Regxido Nando kaj benis lin. Poste, li starigxis de sia sidejo kaj forlasis sen preni la bovlon el la manoj de la regxido. Pro estimo al la Budho, Regxido Nando ne kuragxis diri: "Prenu vian bovlon, Sinjoro!" Anstatauxe, li pensis, ke la Budho prenos gxin cxe la supro de la sxtuparo. Sed la Budho ne prenis gxin. Nando pensis: "Li prenos sian bovlon cxe la malsupro de la sxtuparo." La Budho ne zorgis pri sia bovlo tie. Nando pensis: "Li prenos sian bovlon en la palaca korto." Sed ecx tie la Budho ankoraux ne agis laux la deziro de Nando. Kun dezirego reveni al sia novedzino, Regxido Nando sekvis la Budhon kontrauxvole. Lia estimo al la Budho estis tiel granda, ke li ne kuragxis diri: "Ricevu vian bovlon," sed anstatauxe, li dauxre sekvis la Budhon kun la penso, ke li prenos sian bovlon cxi tie, ke li prenos sian bovlon tie kaj ke li prenos sian bovlon en alia loko. 

　　Tiam oni informis lian novedzinon Gxanapadakaljani, cxarmulino de la tuta lando: "Sinjorino, la Honorulo forkondukis Regxidon Nando. Li intencas rabi lin de vi." Do Gxanapadakaljani tuj postkuris Regxidon Nando lauxeble plej rapide kun larmoj fluantaj sur la vizagxo kaj haroj duonkombitaj. Sxi lauxte vokadis al li: "Bonvolu tuj reveni, Nobla sinjoro!" Sxiaj vokoj tremigis la koron de Nando, sed la Budho tute ne zorgis pri tio. Li kondukis Nandon en la monahxejon kaj diris al li: "Nando, cxu vi volas farigxi monahxo?" La estimo de Regxido Nando al la Budho estis tiel granda, ke li sin detenis de la diro: "Mi ne volas farigxi monahxo," sed li respondis anstatauxe: "Jes, mi volas farigxi monahxo." La Budho diris: "Bone, faru Nandon kiel monahxon". Tiel okazis, ke li monahxigis Nandon en la tria tago post sia reveno al Kapilavasto.

　　Kiam la Budho logxis en Gxetavano, Nando malkontentigxis kaj diris al aliaj monahxoj pri sia problemo. Li diris: "Fratoj, mi malkontentigxis. Nun mi havas religian vivon, sed mi ne plu toleras vivi religie. Mi intencas rezigni la superajn preceptojn kaj reveni al la malsupera vivo de laikuloj."

　　Informigxinte pri tio, La Budho sendis alvenigi Nandon kaj diris al li: "Nando, cxu vere vi diris al multaj monahxoj, 'Fratoj, mi malkontentigxis. Nun mi havas religian vivon, sed mi ne plu toleras vivi religie. Mi intencas rezigni la superajn preceptojn kaj reveni al la malsupera vivo de laikuloj.'" "Jes, vere, sinjoro." "Sed Nando, kial vi malkontentigxis pri via nuna religia vivo? Kial vi intencas rezigni la superajn preceptojn kaj reveni al la malsupera vivo de laikuloj?" "Sinjoro, kiam mi forlasis mian domon, mia nobla edzino Gxanapadakaljani kun haroj duonkombitaj adiauxis min, dirante, 'Bonvolu tuj reveni, Nobla sinjoro!' Sinjoro, cxar mi dauxre sopiras al sxi, mi malkontentigxis pri mia nuna religia vivo, do mi ne plu toleras vivi religie. Mi intencas rezigni la superajn preceptojn kaj reveni al la malsupera vivo de laikuloj." Poste la Budho prenis Nandon je la brako kaj kondukis lin al Cxiela Mondo Tridektri per sia eksterordinara povo. Sur la vojo la Budho montris al Nando avidan simiinon sidantan sur arbostumpo lasita post fajro en iu bruligita loko. La simiino perdis orelojn, nazon kaj voston en la fajro.

　　Kiam ili atingis Cxielon Tridektri, li montris kvincent rozpiedajn cxielajn nimfojn, kiuj venis por servi al Sakao, la Regxo de dioj. Montrinte tiujn vidajxojn al Nando, la Budho demandis: "Nando, kiu laux vi estas pli bela kaj cxarma, via nobla edzino Gxanapadakaljani, aux tiuj kvincent rozpiedaj cxielaj nimfoj?"

　　"Sinjoro," respondis Nando, "kompare kun tiuj kvincent rozpiedaj cxielaj nimfoj, mia nobla edzino Gxanapadakaljani estas ecx malpli bela ol la avida simiino, kiu perdis siajn orelojn, nazon kaj voston."

　　"Gxoju, Nando!" respondis la Budho, "Mi garantias, ke vi gajnos tiujn kvincent rozpiedajn cxielajn nimfojn." Nando respondis: "Se la Honorulo garantias, ke mi gajnos tiujn kvincent rozpiedajn cxielajn nimfojn, estos plezuro por mi teni la sanktan vivon de religiano."

　　Ekde tiam Nando sole praktikis atente, fervore kaj decideme, retirigxinte de la mondo malgraux la malestimo de aliaj monahxoj pro tio, ke li strebas nur por akiri cxielajn nimfojn. Post nelonge, li atingis la plej altan celon de la religia praktikado ecx en tiu cxi vivo. Tiam li eksciis: "Mi jam finis la renaskigxon, pasigis la sanktan vivon kaj plenumis la devon. Mi ne plu renaskigxos en tiu cxi mondo." kaj li farigxis alia honorulo inter Arahantoj.

　　En la nokto Nando proksimigxis al la Budho kaj raportis jene: "Mi rezignas la garantion faritan de la Budho, ke mi gajnos kvincent rozpiedajn cxielajn nimfojn." La Budho respondis: "Nando, mi mem kaptis vian menson per la mia." La monahxoj diris: "Antauxe li kutime diris, 'Mi malkontentigxis.' sed nun li diras 'Mi estis malsagxa korinklinante al la vivo de laikuloj.'" Kaj ili senprokraste iris raporti la aferon al la Budho.

　　Estas necese, ke domo havas bone kovritan tegmenton. Se la tegmento estas malbona, pluvo trairas en la domon. Kiel malbone kovrita tegmento enlasas pluvakvon, ne kulturita temperamento ankaux estas malferma al pasioj. La temperamento ne kulturita estas entrudebla facile por pasio.

　　Kiam la domo estas protektita de bona tegmento, neniu suferas de pluvo, cxar pluvakvo ne povas trairi. En la sama maniero, bone kulturita temperamento ankaux ne permesas pasion trapasi. Do bone kulturita temperamento ne povas esti penetrita de pasioj.