Vidi fonton por 90, 363. Unuflanka Gastamo

　　90, 363. Unudirekta Gastamo

　　[Sendankeco]

　　Iam antauxe du komercistoj reciproke korespondis, sed ili neniam intervidigxis. Unu el ili vivis en Benareso, dum la alia en malproksima limvilagxo.

　　La vilagxa komercisto sendis grandan karavanon al Benareso. Gxi havis 500 cxarojn plenajn de fruktoj, legomoj kaj aliaj produktoj. Li ordonis al siaj subuloj vendi cxiujn varojn per la helpo de la urba komercisto.

　　Atinginte la urbon, ili rekte vizitis la urban komerciston. Ili transdonis al li la alportitan donacon. Li gxojplene invitis ilin logxi en sia propra domo. Li ecx donis monon al ili por ilia cxiutaga elspezo. Li regalis ilin kun la plej granda gastamo. Li demandis pri la bonfarteco de la vilagxa komercisto, kaj prezentis donacon por ke ili portu gxin al li. Kutime lokanoj povis akiri bonan prezon, do li zorgis, ke cxiuj iliaj varoj vendigxis en justa prezo. Ili revenis hejmen kaj diris al sia mastro cxion, kio okazis en la urbo.

　　Poste la urba komercisto sendis karavanon de 500 cxaroj al la limvilagxo. Liaj subuloj ankaux portis donacojn al la vilagxa komercisto. Post kiam ili venis al la vilagxa komercisto, li demandis: "De kie vi venis?" Ili respondis, ke ili venis de la urba komercisto, kiu ofte korespondis kun li.

　　Akceptinte la donacojn, la vilagxa komercisto malgxentile ridis kaj diris: "Cxiuj povus diri, ke ili venis de la urba komercisto!" Poste li elpelis ilin, doninte al ili nek logxejon, nek donacon, nek helpon.

　　La komercistoj de la karavano iris al la urbeta bazaro kaj faris negocon laux sia kapablo sen helpo de la lokano. Ili revenis al Benareso kaj raportis al sia mastro cxion, kio okazis en la limvilagxo. 

　　Post nelonge la vilagxa komercisto sendis alian karavanon de 500 cxaroj al Benareso. Liaj subuloj denove portis donacojn al la urba komercisto. Kiam la subuloj de la urba komercisto vidis ilin, ili diris al li: "Ni scias kiel provizi tauxgajn logxejojn, mangxajxojn kaj monon al tiuj homoj."

　　Ili kondukis la alvenintojn ekster la urbaj muroj al bona loko por tendumi kaj tranokti. Ili diris, ke ili reiros al Benareso por prepari mangxajxon kaj monon por la gastoj.

　　Anstatauxe ili kolektis cxiujn siajn kamaradojn kaj revenis al la kampadejo je la noktmezo. Ili forrabis cxiujn 500 cxarojn, inkluzive de la kostumoj de la vilagxaj komercistoj. Ili forpelis la bovojn, malmuntis kaj forportis la radojn de la cxaroj.

　　Tiuj vilagxanoj terurigxis. Ili kuregis hejmen tiel rapide, kiel iliaj kruroj kapablis porti ilin.

　　La subuloj de la urba komercisto rakontis al li cxion, kion ili faris. Li diris: "Tiuj, kiuj forgesis sian dankemon kaj ignoris simplan gastamon, ricevas tion, kio indas al ili. Tiuj, kiuj ne aprezas la ricevitan helpon, baldaux trovos, ke neniu volas helpi ilin plu."

　　La moralinstruo estas: Se vi ne helpas aliajn homojn, vi ne povas revi, ke la aliaj helpu vin.