Vidi fonton por 79. Senpatrina Filo

　　79. Senpatrina Filo

　　[Perfido]

　　Iam antauxe Regxo Brahmadato regis en Benareso de norda Hindio. Li havis sagxan ministron, kiu tre placxis al li. Por montri sian aprezon al li, la regxo enoficigis lin kiel estron de malproksima limvilagxo. Kiel reprezentanto de la regxo, la vilagxestro kolektis imposton de la vilagxanoj.

　　Post nelonge la estro estis tute akceptita de la vilagxanoj. Cxar li estis sendito de la justa Regxo Brahmadato, oni ege estimis lin. Oni tre fidis lin kvazaux li naskigxus inter ili.

　　Krom sia inteligenteco, la vilagxestro ankaux havis fortan avidemon. Kolekti regxan imposton ne profitigis lin suficxe. Post sia amikigxo kun bando de banditoj, li elkovis planon por sin ricxigi pli facile.

　　La vilagxestro diris al siaj banditaj amikoj: "Mi trovos pretekston kaj motivon por konduki cxiujn vilagxanojn en la gxangalon. Tio estos tre facila por mi, cxar ili fidas min kiel sian propran amikon. Mi tenos ilin okupitaj en la gxangalo dum vi trudigxos en la vilagxon kaj prirabos cxion valoran. Forportu cxion antaux ol mi rekondukos la vilagxanojn hejmen. Kiel danko por mia helpo vi devas doni al mi duonon de la prirabajxo." La banditoj konsentis, kaj ili decidis pri la tempo de la ago.

　　Kiam venis la decidita tago, la vilagxestro kunvenigis cxiujn vilagxanojn kaj kondukis ilin en la gxangalon. Sekve, la banditoj sin trudis en la negarditan vilagxon laux la plano. Ili forsxtelis cxion valoran, kion ili povis eltrovi. Mortiginte cxiujn sendefendajn bovojn en la vilagxo, ili ankaux kuiris kaj mangxis la viandon. Je la vesperigxo, la bando kolektis sian prirabajxon kaj forfugxis.

　　Hazarde en la sama tago vojagxanta komercisto venis al la vilagxo por vendi siajn varojn. Kiam li vidis la banditojn, li tuj sin kasxis de ili.

　　La vilagxestro kondukis la vilagxanojn hejmen en la vespero. Li ordonis al ili fari grandan bruon tamburante dum la irado al la vilagxo. Se la banditoj ankoraux restus tie, ili povus auxdi, ke la vilagxanoj jam revenis.

　　La vilagxanoj malgxojegis vidinte, ke ili estis prirabitaj kaj cxiuj bovoj estis mortigitaj kaj parte formangxitaj. La vojagxanta komercisto aperis kaj diris al ili: "Tiu malhonesta vilagxestro jam perfidis vian fidon al li. Eble li estas kunlaboranto de la banditoj. Nur post kiam ili forlasis kun cxiuj viaj valorajxoj, li kondukis vin hejmen, tamburante tiel lauxte kiel eble! La vilagxestro sin sxajnigis nenion scii pri la okazajxo kiel senscia novnaskita sxafido! Fakte tio similas al la afero, ke se knabo faris grandan hontindajxon, lia patrino kutime diris, 'Mi ne estas lia patrino. Li ne estas mia filo. Mia filo jam mortis!'"

　　Post nelonge la novajxo pri la krimo atingis la regxon. Li alvenigis la perfideman vilagxestron kaj punis lin laux la legxo.

　　　　La moralinstruo estas: Neniu protektas perfidulon.